Juljan Shehu vazhdon të jetë një nga lojtarët më të spikatur të Vidzev Lodz, në kampionatin polak të futbollit, edhe pse skuadra e mesfushorit të Kombëtares shqiptare, po kalon në periudhë jo edhe aq të mirë dhe aktualisht gjendet në pjesën e poshtme të klasifikimit.

Në ndeshjen e sotme ndaj Korona Kielce, Shehu ka qenë përsëri protagonist me klubin e tij, duke shënuar një gol në humbjen 3-1 të skuadrës së Vidzev.

Në startin e pjesës së dytë, pas zhvillimit të një goditje nga këndi, ai ishte i aftë të niste aksionin për të bërë devijimin e duhur, duke çuar sferën në rrjetë për të shkurtuar përkohësisht diferencën në 2-1.

SHIH VIDEON

Një gol të cilin ai e festoi si zakonisht me “shqiponjë”, teksa këtë radhë ka shijen e një “paradhënie” për duelin e marsit në play-off të Botërorit që Shqipëria do të luajë pikërisht në Poloni ndaj vendasve. Dhe Shehu ka treguar se di të shënojë në Poloni, pasi ky ishte goli i tij i katërt në kampionatin polak në këtë sezon, duke barazuar që tani numrin e rrjetave të tundura një edicion më parë.

PANORAMASPORT.AL

© Panorama.al