TIRANË- Opozita do të mbajë sot foltoren e radhës përpara Kryeministrisë. Ashtu si në dy tubimet e para, edhe kjo e sotmja do të nisë në orën 18:00, ku pritet që të mbajnë fjalime qytetarë, partitë aleate të PD-së për ta përmbyllur me kryedemokratin Sali Berisha.
-
PD “hap” sot “Parlamentin para Kryeministrisë”, detaje nga protesta
17 Nëntor, 08:48
-
PD ka mbajtur më herët dy protesta përpara Kryeministrisë, me 17 dhe 24 nëntor, të cilat kanë qenë kryesisht të qeta dhe pa incidente. Tubimi i 17 nëntorit që zgjati më shumë se 90 minuta, ishte i pari që pas zgjedhjeve të 11 majit dhe që çeli një sezon protestash, tashmë para kryeministrisë. Lideri demokrat Berisha mbajti fjalën e tij në këtë protestë, nga ku hodhi akuza drejt kryeministrit Rama për projektligjin e Barazisë Gjinore dhe lënien në harresë të trajtimit të të sëmurëve me kancer.
Në protestën e dytë të 24 nëntorit, Berisha hodhi akuza të tjera ndaj qeverisë dhe kërkoi largimin e kryeministrit Edi Rama dhe zv/kryeministres Belinda Balluku, e cila ndodhet nën hetim nga SPAK për aferën e Tunelit të Llogarasë. Nga “Foltorja 2”, Berisha shigjetoi qeverinë, duke e cilësuar si ‘antishqiptare dhe më të korruptuarën në historinë e Shqipërisë’.
Siç është bërë me dije më herët nga kreu i demokratëve Sali Berisha, aksioni opozitar do të jetë i përjavshëm, në formën e një platforme parlamente me podium dhe foltore në Bulevardin e kryeqytetit, dhe është radha e skenarit për protesta kombëtare. Ai shtoi se qëllimi nuk është vetëm shpëtimi i opozitës, por i Shqipërisë nga krimi dhe korrupsioni, duke paralajmëruar se fundi i qeverisë do të vijë nga kjo betejë në shesh./ZËRI
