Tensionet midis Federatës Spanjolle të Futbollit (RFEF) dhe Barcelonës janë ndezur përsëri për shkak të Lamine Jamal.
Pasi ylli i ri i blaugranave u dërgua përsëri në Katalonjë, “La Roja” akuzoi klubin se nuk kishte informuar stafin mjekësor të ekipit kombëtar për vizitën e tij te një specialist për dhimbje në ijë. Këto akuza u konfirmuan dje nga trajneri Luis de la Fuente në një konferencë për shtyp.
Këtë mëngjes, presidenti i blaugranave, Joan Laporta, u përgjigj duke u përpjekur të qetësonte polemikat në “Catalunya Radio”: “Ne e informuam federatën sapo mësuam për këtë. Kur mjeku që e ekzaminoi na tha se Lamine kishte nevojë për dhjetë ditë pushim, ne njoftuam ekipin kombëtar. Ne i respektojmë të gjitha palët dhe nuk duam të futemi në polemika. Ne thjesht po përpiqemi t’i trajtojmë lojtarët tanë me ritmin që e konsiderojmë më të përshtatshëm.”
Laporta më pas mbrojti vendimin e klubit, duke theksuar cilësinë e kujdesit që mori: “Të hënën, mjeku, një autoritet në fushën e tij, mbërriti, e ekzaminoi dhe përcaktoi trajtimin. Gjithçka shkoi mirë. Ne duam që Lamine të jetë 100% i gatshëm për Barçën. Kjo periudhë pushimi përkon me angazhimet e tij me ekipin kombëtar, por nuk mendoj se kjo e penalizon Spanjën, ekipi është në një pozicion të shkëlqyer.”
Laporta përfundoi duke përsëritur qëndrimin e klubit: “Ne bëjmë atë që besojmë se është e drejtë në interesin më të mirë të Barcelonës.”
Paqja midis klubit dhe RFEF-së, megjithatë, duket ende larg.
Te lidhura
