Majkëll Olise fitoi vetëbesim shtesë gjatë aktivizimit me kombëtaren – dhe mori lavdërime të shumta. Trajneri belg me siguri u ndje i lehtësuar kur pa se lojtarët e tij francezë, Upamekano dhe Majkëll Olise, u pushuan sipas pritshmërive në fitoren 3-1 në Azerbajxhan.
Të dy kishin kontribuar fort në fitoren vendimtare 4-0 kundër Ukrainës. Anësori, i vendosur fillimisht në krahun e djathtë, i dha Francës shtysën sidomos kur kaloi në rolin e numrit 10. Kjo funksionoi aq mirë saqë gazeta L’Ékip shkroi:
“20 minutat e fundit të sulmuesit të Bajernit duhet të futen në librat e shkollës për numrin 10.” “Kur luajti në qendër, pati shumë hapësirë dhe mundi të zhvillohej më shumë,” e lavdëroi trajneri i Francës, Didier Deshamps. “Me numrin e ndeshjeve që luan, nuk është gjithmonë në nivelin maksimal. Por Majkëll është një pjesë e rëndësishme e gjithçkaje që përbën lojën tonë sulmuese.”
Me siguri edhe Kompani do ta përsëriste këtë, dhe Olise është titullar i padiskutueshëm te Bajerni. Edhe rëniet më të vogla në formë – nëse mund të quhen të tilla – menjëherë hapin diskutime për 23- vjeçarin, sepse ai ngriti pritshmëritë shumë lart në vitin e tij të parë në Mynih, duke kontribuar në total me 31 gola dhe asistime në kampionat. Pyetja nëse ai duhet të përdoret më shpesh si numri 10 në Mynih as që shtrohet për disa arsye.
Së pari, Gnabri po luan shkëlqyeshëm këtë sezon në atë rol, duke zëvendësuar të dëmtuarin Musiala. Së dyti, Olise dhe Gnabri shpesh ndërrojnë pozicionet gjatë lojës: ndonjëherë Gnabri shkon në krahun e djathtë, ndonjëherë Olise futet në qendër. Për më tepër, që pas ardhjes së Luis Diaz, barra e golave është shpërndarë më gjerë. Kolumbiani e plotëson mjaft mirë Olisen në krahun e majtë, duke krijuar hapësira dhe duke hyrë në situata të rrezikshme për shënim. Kjo do të thotë se fokusi nuk është më vetëm te numri 17 i Bajernit apo Herri Kejn. Kompani mund të rikthehet në punë këtë javë me qetësi të plotë. Pas 16 fitoreve në 17 ndeshje, tani fillon faza e fundit e vitit – me Olisen që me siguri nuk ndihet i mbingarkuar.
PANORAMASPORT.AL
Te lidhura
