Kreu i Aleancës për Ardhmërinë e Kosovës (AAK), Ramush Haradinaj, ka njoftuar se nuk do të rikandidojë për drejtimin e partisë në zgjedhjet e brendshme që pritet të mbahen në muajt në vijim.
Pas mbledhjes së Këshillit të Përgjithshëm të AAK-së, Haradinaj bëri të ditur se procesi zgjedhor brenda partisë do të zhvillohet nga 20 shkurti deri më 6 qershor. Ai theksoi se vendimi për të mos kandiduar vjen pas një periudhe të gjatë në krye të subjektit, që nga themelimi i tij në maj të vitit 2000, si dhe pas rezultateve jo të kënaqshme në dy proceset e fundit zgjedhore të 9 shkurtit dhe 28 dhjetorit 2025.
Në zgjedhjet e fundit parlamentare, AAK siguroi gjashtë ulëse në Kuvendin e Kosovës.
Sipas Haradinajt, deri tani kandidaturën për kryetar të ri të partisë e ka shpallur Ardian Gjini, ndërsa nuk përjashtohen edhe kandidatura të tjera.
I pyetur për një kandidim të mundshëm për president, Haradinaj u shpreh se nuk do të jetë në garë. Ndërkohë, lidhur me qëndrimin e AAK-së për një mandat të dytë të Vjosa Osmanit në krye të shtetit, ai tha se partia ende nuk ka marrë një vendim.
Haradinaj është zgjedhur deputet në legjislaturën e dhjetë të Kuvendit të Kosovës, e konstituuar së fundmi, ndërsa në zgjedhjet e dhjetorit ai ishte kandidat i AAK-së për kryeministër. Në të kaluarën, ai ka ushtruar dy herë detyrën e kryeministrit të Kosovës.
Te lidhura
