Hamdi Salihi mbetet një nga emrat më të rëndësishëm të futbollit shqiptar në dekadave e fundit. Sulmuesi shkodran, i njohur për instinktin e tij të pamëshirshëm para portës, ka ndërtuar një karrierë të pasur me gola dhe trofe në Shqipëri, Austri, Kinë dhe më gjerë.
Në Shqipëri, Veç Vllaznisë, Salihi shpërtheu me fanellën e KF Tiranës, ku fitoi dy herë Superkupën e Shqipërisë (2005-06 dhe 2006-07), Kupën e Shqipërisë (2005-06) dhe titullin kampion në sezonin 2006-07. Me 29 gola në sezonin 2005-06, ai u shpall golashënuesi më i mirë i Kategorisë Superiore, duke treguar se ishte një “vrasës” i lindur në zonën e rreptësisë.
Pas suksesit në vend, Salihi mori rrugën drejt Austrisë, ku veshi fanellën e SV Ried dhe më pas të Rapid Vjena, duke lënë gjurmë të thella edhe në futbollin austriak. Me Riedin ai u rendit i dyti në listën e golashënuesve të ligës në sezonin 2008-09, ndërsa me Rapid Vienna spikati në Europa League (2009-10 dhe 2010-11), ku realizoi gola të rëndësishëm për klubin. Në kupat e Austrisë, ai shkëlqeu duke u shpallur golashënuesi më i mirë në ÖFB-Cup në dy sezone radhazi (2010-11 dhe 2011-12).
Në vitin 2012, Salihi provoi një aventurë të re në Azi, duke u bashkuar me Jiangsu Sainty në Kinë. Edhe atje nuk munguan sukseset. Ai u bë fitues i Superkupës së Kinës (2012-13) dhe kontribuoi me gola në AFC Champions League, duke shënuar 2 herë në kompeticionin më të rëndësishëm aziatik për klube. Pas eksperiencave jashtë vendit, “bomberi” u rikthye në atdhe për t’u bashkuar me Skënderbeun, klub me të cilin arriti kulmin e karrierës në nivel kombëtar.
Ai fitoi një titull kampion të Shqipërisë (2015-16), mori pjesë në Europa League (2015-16) dhe u shpall Futbollisti i Vitit në Shqipëri (2016). Po në atë sezon, ai ishte edhe golashënuesi më i mirë i Kategorisë Superiore me 27 gola, duke konfirmuar edhe një herë klasën e tij. Ka luajtur edhe në Greqi, Amerikë dhe Izrael.
PANORAMASPORT.AL
Te lidhura
