Kreu i Lëvizjes Vetëvendosje, kryeministri Albin Kurti, tha sot (9 nëntor) se në bazë të rezultateve që kanë marrë nga komisionarët zgjedhorë, partia e tij ka fituar në Mitrovicë të Jugut, Fushë Kosovë, Obiliq dhe Gjilan në raundin e balotazhit për zgjedhjet lokale në Kosovë.
Në total, në këto zgjedhje lokale, LVV, tha Kurti, ka fituar në shtatë komuna.
“Ky është një sukses i LVV-së. Natyrisht që kemi synuar më shumë se kaq”, tha ai.
Kurti tha se në partitë e tjera u bashkuan kundër LVV-së në raundin e balotazhit, prandaj ky rezultat “është një sukses i LVV-së”.
Pas humbjes në Obiliq, Xhafer Gashi jep dorëheqje nga funksionet në LDK
Kandidati i LDK-së për Obiliqin, Xhafer Gashi, dha dorëheqje nga të gjitha funksionet në këtë parti pasi humbi zgjedhjet lokale.
Ai i uroi sukses Halil Thaçit nga LVV-ja. Gashi kishte qenë kryetar i Obiliqit për 12 vjet.
“Ndoshta nuk ia kemi dalë për arsye se diku na kanë vjedhur, atëherë unë si kryetar i degës së LDK-së në Obiliq e marr përgjegjësinë për humbjen dhe jap dorëheqje nga Këshilli i Përgjithshëm, nga kryesia e Lidhjes Demokratike dhe nga kryetar i nëndegës”, tha ai.
Gashi ishte kryetar i Obiliqit për 12 vjet.
Tahiri uron Pecin për fitoren në Mitrovicë të Jugut
Arian Tahiri i PDK-së ia ka uruar fitoren në Mitrovicë të Jugut kundërkandidatin e tij nga LVV-ja Faton Peci.
Përmes një bisede telefonike në një studio televizive kur u pyet nëse e uron Pecin, ai tha se “e uroj”.
Numërimi i votave në këtë komunë ende nuk ka përfunduar.
Prebreza: Pas 25 vjetësh, pushteti komunal në Fushë Kosovë po i kthehet qytetarëve
Valon Prebreza, kandidat i LVV-së për Fushë Kosovë, tha se pas 25 vjetësh, “pushteti komunal në Fushë Kosovë po i kthehet qytetarëve”.
Ai falënderoi kryetarin e partisë së tij, Albin Kurti, për mbështetjen, por edhe qytetarët.
“Kjo fitore është fitore e qytetarëve të Fushë Kosovës”, tha ai, teksa Kurti, që është kryeministër në detyrë i Kosovës, i premtoi “mbështetje të fuqishme” nga ekzekutivi kosovar.
LDK-ja e kishte udhëhequr këtë komunë që nga përfundimi i luftës.
Te lidhura
