Pas polemikave të muajit të kaluar, duket se Mauricio Poçetino ka reflektuar. Përzgjedhësi i Shteteve të Bashkuara ka vendosur të mos e thërrasë Kristian Pulisiç për miqësoret e nëntorit ndaj Paraguait dhe Uruguait. Një lajm që është pritur me buzëqeshje në Milanelo, ku Masimiliano Alegri mund më në fund të menaxhojë amerikanin pa frikë nga dëmtime të reja.

Në thirrjen e fundit, Pulisiç ishte aktivizuar megjithëse vuante nga probleme muskulore, dhe u kthye në Itali me një dëmtim në bicepsin femoral të djathtë që e mbajti jashtë fushës për gati një muaj. Kritikët ia vunë fajin trajnerit argjentinas, i cili kishte rrezikuar futbollistin pavarësisht kushteve jo të përshtatshme fizike. Këtë herë, ndoshta i penduar, Poçetino ka zgjedhur rrugën e kujdesit.

Amerikani pritet të rikthehet në fushë fundjavën e ardhshme kundër Parmës, por stafi mjekësor i Milanit do të ndjekë me kujdes ngarkesën e tij të punës për të shmangur përsëritjen e dëmtimit. Alegri e sheh si lojtar kyç për ndeshjet vendimtare të nëntorit, përfshirë derbin e Milanos që po afrohet. Në Milanelo, gjatë pauzës së kombëtareve, do të qëndrojë edhe sulmuesi meksikan Santiago Himenez. Ai nuk është përfshirë në listën e kombëtares së Meksikës për shkak të një dëmtimi në kyçin e këmbës, të cilin e ka mbajtur fshehur prej disa javësh.

“Kam luajtur me dhimbje për shumë kohë,” – ka shkruar lojtari në rrjetet sociale – “por tani është momenti të ndalem dhe të rikuperohem plotësisht.” Në kampin kuqezi mbizotëron qetësia: mungesat në kombëtare u japin mundësinë lojtarëve të rikuperohen dhe trajnerit të punojë me grupin e plotë. Për Milanin, që ka vuajtur shumë dëmtime këtë sezon, ky pushim mund të kthehet në një bekim. Ndërkohë, lajmi i vetëm jo aq i mirë vjen nga Franca.

Adrien Rabiot është përfshirë nga Didier Deshomps në listën e “Les Bleus” për ndeshjet kualifikuese kundër Ukrainës dhe Azerbajxhanit, edhe pse ende nuk është në formë optimale pas një problem kohët e fundit. Në Milano shpresojnë që trajneri i Francës të tregojë kujdes dhe të mos e forcojë situatën e mesfushorit, i cili pritet të rikthehet në formë të plotë pikërisht për derbin. Nëse gjithçka shkon sipas planeve, Alegri do të ketë të gjithë yjet e tij gati për sfidat e mëdha që e presin skuadrën në fund të muajit. Dhe ndoshta, këtë herë, mund të falënderojë edhe një Poçetino… pak më të arsyeshëm.

IGLI ÇUTRA-PANORAMASPORT.AL

© Panorama.al