TIRANË- Kryeministri Edi Rama zhvilloi sot një vizitë tek “Vila 31″ ku një ditë më parë u hodhën bomba molotov dhe fishekzjarre nga protestuesit e opozitës. Policia njoftoi se nga hedhja e molotovëve dhe lëndëve plasëse, Policia njoftoi se vila e ish-diktatorit Enver Hoxha u dëmtua, teksa brenda saj ndodheshin 7 artistë dhe disa pjesëtarë të stafit.
Rama u shpreh se gjatë vizitës së shkurtër ka takuar të rinj të talentuar që “ishin traumatizuar nga çmenduria e barbarisë së mbrëmshme”, duke iu referuar protestës së opozitës.
Edi Rama:Sapo dola nga rezidenca e artistëve në ish-shtëpinë e diktatorit, ku prej kohësh tanimë fondacioni prestigjoz Art Explora mikpret të rinj të talentuar nga Shqipëria, Kosova e mbarë bota, të cilët i gjeta të traumatizuar nga çmenduria e barbarisë së mbrëmshme. Një sulm i verbër i një grushti të verbërish të paguar për të frikësuar qytetin dhe njollosur Shqipërinë, nën udhëheqjen e një ligësire kriminale tetëdhjetë e kusur vjeçare, që mban nga pas ca hunj gardhi me status deputeti, e që vjen vërdallë si i marri i lagjes nëpër Tiranë, ndërkohë që s’ia var më thuajse askush!
Gjykatësit që i lirojnë këta zjarrvënës të rrezikshëm, sa herë arrestohen nga policia janë bashkëpërgjegjës për këto vandalizma të pandodhura askund në Europë me bekimin e nën hyqmin e një partie parlamentare, në selinë e të cilës nuk flitet për ide e programe, po bëhen vetëm plane dhune dhe bomba artizanale! Turp për çdo gjykatës që rinxjerr në rrugë këta keqbërës të Shqipërisë dhe turp për qeverisjen e gjyqësorit që rri e vështron sikur Shqipëria nuk është edhe atdheu i saj!
