TIRANË- Ish-deputeti i Partisë Demokratike, Ervin Salianji, ka reaguar pas deklaratës së kryedemokratit Sali Berisha, sipas të cilit ish-ligjvënësi është vetëpërjashtuar si pasojë e lëvizjes së tij të re. Përmes një postimi në rrjete sociale, Salinaji kundërshtoi Berishën duke i rikujtuar atij se vetë Kushtetuta e PD-së nuk njeh ‘vetëpërjashtime’.
Për Salianjin ‘mungesa e seriozitetit ndaj demokratëve të shumtë që mendojnë ndryshe është një gafë e rëndë’, teksa shtoi se pjesëmarrësit në takimet e tij janë demokrat 24 karat. Në fund të reagimit, Salianji njofton takimin e radhës së Foltores së tij, të dielën e 18 janarit, në Lezhë.
Reagimi i plotë
Askush nuk është mbi Kushtetutën e Partisë Demokratike, të miratuar nga anëtarësia me votë! Mungesa e seriozitetit ndaj demokratëve të shumtë që mendojnë ndryshe është një gafë e rëndë. Të gjithë pjesëmarrësit në takimet e mia janë demokrat 24 karat. Meritojnë vetëm respekt dhe mirënjohje.
Partia Demokratike ka nevojë për qartësi. Partia Demokratike ka nevojë të bëhet fituese. Këtë ja u ka borxh demokratëve, pas 13 vitesh opozitë. Kjo është pritshmëria e të gjithë shqiptarëve që duan dhe presin rotacionin.
Bashkimi i demokratëve dhe i gjithë opozitës rreth saj duhet të jetë përpjekja më serioze për ta bërë Partinë Demokratike fituese.
Ky qëllim është i parashikuar qartë në statut dhe më përgjegjësi në rast humbjeje dhe privilegje në rast fitoreje. Kushtetuta e demokratëve nuk ka as “vetpërjashtime”.
Do vazhdoj të përfaqësoj pa ndalim dhe me gjithë sa kam shqetësimin real të demokratëve! Vullnetin e tyre për bashkim, për dinjitet dhe për një Parti Demokratike fituese.
Shihemi të Dielën në Lezhë
Çfarë deklaroi Berisha?
Kryedemokrati Sali Berisha komentoi zhvillimet e brendshme në Partinë Demokratike. Në konferencën e përjavshme, Berisha është ndalur te zgjedhjet që pritet të mbahen në pranverë për drejtimin e partisë. I pyetur nga gazetarët nëse do ta shpallë kandidaturën për kryetar edhe nëse Partia Demokratike do të pranonte kandidaturën e Ervin Salianjit, Berisha u shpreh se ky i fundit nuk është i përjashtuar nga partia, por është vetëpërjashtuar përmes veprimeve të tij.
“Një sqarim, nuk jam këtu për atë çështje. Ai është i vetëpërjashtuar. Lexo nenin 24, është i vetëpërjashtuar”, deklaroi Berisha./ZËRI
