TIRANË- Në prag të nisjes së sesionit të ri Parlamentar, 19 janar, përfaqësues të Ambasadës Amerikane në Tiranë do të zhvillojnë një tur takimesh me krerët e grupeve parlamentare të Partisë Socialiste dhe Partisë Demokratike, në Kryesinë e Kuvendit.
Mësohet se në orën 12:00 ka nisur takimi me kreun e grupit parlamentar të PS-së, Taulant Balla. Ndërsa, në orën 14:00, përfaqësues të ambasadës do të takohen me kreun e grupit parlamentar të PD, Gazment Bardhi.
Një ditë më parë, kryetari i Kuvendit, Niko Peleshi, shpalosi kalendarin për punimet në sesionin e ri Parlamentar. Sipas njoftimit zyrtar, Kryetari i Kuvendit ka nxjerrë urdhrat për organizimin dhe zhvillimin e veprimtarisë parlamentare:
-Me Urdhrin nr. 1, datë 12.01.2026, është thirrur mbledhja e Konferencës së Kryetarëve më 19 janar 2026, ora 11:00, në Kryesinë e Kuvendit.
-Në rendin e ditës përfshihet shqyrtimi dhe miratimi i projektprogramit dhe projektkalendarit të punimeve të Kuvendit, si edhe projektkalendarit të ushtrimit të kontrollit parlamentar, në përputhje me Rregulloren.
-Me Urdhrin nr. 2, datë 12.01.2026, është thirrur seanca plenare e Kuvendit më 19 janar 2026, ora 17:00.
Seanca plenare do të shënojë hapjen e Sesionit II të Legjislaturës XI dhe do të zhvillohet me rend dite procedurial, i cili përfshin miratimin e procesverbalit të seancës së mëparshme si dhe njoftime, në përputhje me Rregulloren e Kuvendit./ZËRI
