Kryeministri i Kosovës, Albin Kurti, ka shprehur mbështetjen e tij për Shtetet e Bashkuara të Amerikës në sulmin e ndërmarrë në Venezuelë, dhe arrestimin e presidentit Nicolas Maduro dhe bashkëshortes së tij, Cilia Flores.
Në një postim në rrjetet sociale, Kurti thekson se Republika e Kosovës mbështet operacionin anti-narkotik të SHBA-së, në Venezuelë.
“Mbajtja përgjegjëse e aktorëve shtetërorë të përfshirë në trafikimin e drogës është thelbësore për suksesin në luftën kundër kësaj dukurie”, thekson ai.
Kurti nënvizoi gjithashtu rolin strategjik të Kosovës si aleate e SHBA-së dhe NATO-s, duke theksuar mbështetjen për luftën kundër trafikimit të narkotikëve dhe mbrojtjen e vlerave demokratike perëndimore.
Postimi i plotë i Albin Kurtit:
Republika e Kosovës mbështet operacionin anti-narkotik të Shteteve të Bashkuara të Amerikës, të udhëhequr nga Presidenti Donald Trump, në Venezuelë. Mbajtja përgjegjës e aktorëve shtetërorë të përfshirë në trafikimin e drogave është thelbësore për suksesin në luftën kundër kësaj dukurie.
Kosova, si aleate strategjike e ShBA-së dhe NATO-s, ofron mbështetje të plotë në luftën kundër trafikimit të narkotikëve dhe kundër cenimit të vlerave demokratike perëndimore nga aktorë përfaqësues (proxy) të kundërshtarëve të këtyre vlerave, si në rajonin tonë ashtu edhe më gjerë.
Në këtë kontekst, ritheksojmë nevojën për rritjen e vëmendjes ndaj aktorëve të caktuar rajonalë, të cilët në vazhdimësi synojnë provokimin e situatës së sigurisë përmes veprimeve hibride, kriminale, terroriste dhe ushtarake.
Te lidhura
