Legjenda e futbollit italian, Roberto Baggio, është rikthyer të flasë për Kupën e Botës dhe emocionet që e lidhin me turneun më të madh të futbollit.
Në një intervistë për FIFA-n, “Il Divin Codino” shprehu dëshirën e tij më të madhe: të shohë Italinë sërish në skenën më të rëndësishme në Botërorin 2026, që do të zhvillohet në SHBA, Kanada dhe Meksikë.
“Shpresoj që Italia të mos i zhgënjejë tifozët”
Baggio theksoi se kualifikimi është i rëndësishëm jo vetëm për futbollin italian, por edhe për komunitetet e mëdha të emigrantëve:
“Shpresoj që Kombëtarja italiane të jetë aty, sepse ka shumë bashkëatdhetarë që jetojnë në Amerikë dhe duan ta shohin Italinë protagoniste. Dëshira ime është që të mos i zhgënjejmë të gjithë këta njerëz plot pasion dhe dashuri për ngjyrat tona”.
Kujtimet e USA ’94: një histori e bukur me fund të hidhur
Rikthimi i Botërorit në SHBA sjell menjëherë ndërmend edicionin e vitit 1994, kur Baggio udhëhoqi Italinë deri në finalen e famshme të Pasadena-s, të humbur me penallti kundër Brazilit.
“Ka qenë një moment fantastik… përveç finales, ku isha protagonist në mënyrë negative. Por e gjithë ajo eksperiencë ishte e mrekullueshme dhe unike. Do ta mbaj mend gjithë jetën”.
Baggio dha edhe një mesazh për futbollistët e rinj:
“Shpresoj që brezat e rinj t’i përjetojnë ato emocione me të njëjtin pasion si ne. Mundësitë nuk kthehen më, ndaj secili duhet të japë 100% për të mos pasur pengje”.
Baggio mbështet Botërorin me 48 ekipe
Ish-numri 10 i Italisë u shpreh pozitivisht për zgjerimin e turneut në 48 skuadra, një risi që FIFA do të zbatojë në 2026:
“E shoh si një mundësi shumë të rëndësishme. Gjëja më e bukur është që kaq shumë ekipe të reja do të mund të marrin pjesë në këtë event”.
Te lidhura
