TIRANË- Kryeministri Edi Rama ka ftuar sot në podcastin “Flasim” kandidatët e Partisë Socialiste për zgjedhjet e pjesshme lokale të së dielës. Në fund të bisedës me ta, ku ironizoi kandidatët e pavarur të mbështetur nga opozita, Rama pyeti socialistët, se cilat ishin parashikimet e tyre për zgjedhjet e së dielës.
Të gjithë padyshim e mendonin fitoren, ndërkohë që më entuziasti dukej pasuesi i Tërmet Peçcit në Tepelenë. Gramoz Sako tha se parashikon fitoren në zgjedhjet e së dielës me 83% të votave. Në shifra të ngjashmë synonte dhe Bruna Mersini në Vlorë, me 80% të parashikimit të saj. Ndërkohë që kandidatët për Beratin, Matin dhe Cërrikun, u shprehën për një fitore në shifrat e 70% të mbështetjes.
Kreu i qeverisë, Edi Rama, duke ironizuar opozitën tha se halli i tyre pas zgjedhjeve do të jetë “kujt t’ia lënë humbjen në derë”.
