TIRANË- Kreu i SPAK, Altin Dumani, raportoi sot në Kuvend punën e institucionit që ai drejton për vitin 2024, ndërsa më pas iu është përgjigjur 57 pyetjeve të opozitës. Deputeti Flamur Noka e pyeti Dumanin për hetimet e nisura ndaj kryebashkiakut të PS në Vaun e Dejës, Kristian Shkreli. Sipas Nokës, para se ta bënte publike SPAK, e bëri vetë kryeministri me deklaratën që asokohe u bë virale: “Kristoan mos luaj me dy porta”. Nga ana tjetër, Dumani ka deklaruar se në fakt, procedimi penal për Shkrelin ka filluar kohë para këtij deklarimi.
Noka: Atë para se ta bënit publike ju e bëri publike kryeministri, çdo qytetar e mban mend deklaratën e kryeministrit: Kristian mos luaj me dy porta.
Dumani: Procedimi penal ka filluar kohë para këtij deklarimi dhe unë mund të them që po ky është një hetim i suksesshëm. Ka bërë të mundur marrjen e përgjegjësive penale dhe dërgimin për gjykim të kryetarit të bashkisë së Vaut të Dejës për një vepër penale shumë problematike siç është ajo e korrupsionit aktiv në zgjedhje.
