TIRANË- Kryetari i Kuvendit, Niko Peleshi, i është drejtuar zyrtarisht me një kërkesë për opinion Komisionin e Venecias mbi projektligjin “Për financimin e partive politike”.
Sipas shkresës të bërë publike, Peleshi ka kërkuar vlerësimin e Komisionit të Venecias lidhur me këtë projektligj, i cili synon rregullimin e kuadrit ligjor për financimin e subjekteve politike në Shqipëri.
Projekt-opinioni pritet të diskutohet dhe të miratohet në Sesionin e 147-të Plenar të Komisionit të Venecias, që do të zhvillohet më 12–13 qershor 2026.
Letra e kreut të Kuvendit, Niko Peleshi drejtuar Komisionit të Venecias:
REPUBLIKA E SHQIPËRISË
KUVENDI
KRYETARI
Prot. nr. 1892
Tiranë, më 24.04.2026
Lënda: Kërkesë për opinion mbi projektligjin “Për Financimin e Partive Politike”
E nderuar Zonja Presidente,
Në emër të Kuvendit të Republikës së Shqipërisë dhe në cilësinë time si Kryetar i Kuvendit, dëshiroj të shpreh vlerësimin tim të sinqertë për kontributin e vazhdueshëm dhe të vlefshëm të Komisionit të Venecias në forcimin e institucioneve demokratike, konsolidimin e shtetit të së drejtës dhe avancimin e proceseve zgjedhore në Republikën e Shqipërisë. Ekspertiza dhe udhëzimet e Komisionit kanë qenë dhe vazhdojnë të jenë thelbësore për të siguruar që reformat ligjore të jenë në përputhje me standardet ndërkombëtare dhe praktikat më të mira.
Në kuadër të bashkëpunimit tonë të vazhdueshëm dhe në vijim të punës së Komisionit të Posaçëm Parlamentar për Reformën Zgjedhore, i mandatuar për të propozuar ndryshimet e nevojshme ligjore në fushën e reformës zgjedhore, dëshiroj t’ju informoj se Komisioni ka përgatitur projektligjin me titull “Për Financimin e Partive Politike”. Ky projektligj synon të adresojë rekomandimet e përcaktuara në raportet e OSBE/ODIHR-it, duke përfshirë gjithashtu standardet ndërkombëtare dhe praktikat më të mira në fushën e transparencës, mbikëqyrjes dhe rregullimit të financimit të partive politike.
Në këtë kuadër, kam nderin t’ju përcjell projektligjin e sipërpërmendur dhe t’ju ftoj me mirësi që Komisioni i Venecias të japë opinionin e tij. Ne do të vlerësonim shumë çdo koment, rekomandim apo vërejtje që ju mund ta konsideroni të përshtatshme. Kontributi juaj do të ishte veçanërisht i rëndësishëm për përmirësimin e mëtejshëm të projektligjit dhe garantimin e përputhjes së tij të plotë me standardet ndërkombëtare dhe praktikat më të mira.
Ju falënderoj paraprakisht për bashkëpunimin dhe mbështetjen tuaj të vazhdueshme dhe pres me interes marrjen e opinionit tuaj të çmuar për këtë çështje.
Niko Peleshi
Znj. Claire Bazy-Malaurie
Presidente e Komisionit të Venecias
Këshilli i Europës
Partitë kryesore politike në vend, PS dhe PD, kanë nxjerrë për konsultim publik draftin e ri për projekligjin për “Financimin e partive politike”, në kuadër të Reformës Zgjedhore si dhe procesit të integrimit europian. Projektligji synon rritjen e transparencës, duke detyruar partitë të raportojnë financat gjatë gjithë vitit, jo vetëm në fushata zgjedhore. Për monitorimin dhe zbatimin e këtij ligji, institucioni përgjegjës do të jetë Komisioni Qendror i Zgjedhjeve.
Ligji përcakton qartë burimet e lejuara të financimit, si kuotat e anëtarësisë, donacionet, fondet nga buxheti i shtetit dhe huatë, ndërsa ndalon financimet nga subjekte të huaja, kompani të cilat kanë përfituar kontrata publike, donatorë anonimë apo individë të dënuar për krime të rënda. Ndërsa formula për buxhetin e shtetit mbetet e njëjtë.
Një risi në këtë projekligj është edhe financimi i grave dhe të rinjve në stukturat e partive politike me një grant prej 5% nga Fondi Publik, i cili do të hyjë në fuqi nga 1 janari i vitit 2027.
