Fund viti dhe natyrisht edhe kohë bilancesh. Në fund dikush qesh e sikush tjetër hidhërohet, sidomos kur nuk është mësuar me dështimet. Kjo ka ndodhur me Realin e Madridit, i cili ka pasur një vit të tmerrshëm kalendarik. Fitorja e unës kundër Sevijas nuk e lehtëson shumë një vit 2025 të pllakosur nga momente të trazuara. Klubi dhe skuadra e parë janë larg ditëve të lavdisë së sezonit 2023-24, shumë më afër në kohë sesa në ndjesi. Pesë titujt e atij sezoni janë në kontrast të fortë me zeron absolute të këtij viti 2025, i cili tashmë ka ardhur në fund në aspektin sportiv. Një vit me numër tek, i cili në Madrid tenton të jetë joproduktiv.
NISJA E VITIT
Viti 2025 filloi me një humbje të dhimbshme në finalen e Superkupës së Spanjës në Arabinë Saudite, një paralajmërim i zhgënjimeve që do të vinin. Rezultati 2-5 në favor të Barcelonës krijoi një pamje të zymtë, megjithëse më pak të zymtë nga sa u bë në fund, pasi Barcelona i rrëmbeu dy titujt e tjerë vendas Real Madridit. Së pari, Kupa e Mbretit në finalen e dhimbshme në “La Cartuja” në fund të prillit. Pak më vonë, një tjetër humbje kundër katalanasve, pavarësisht një tregolëshi nga Mbape në “Montjuic”, ia dha titullin e LaLigës skuadrës së Hansi Flik.
REZULTATET NË EUROPË
Paraqitja europiane nuk ishte shumë më e mirë. Debutimi i Realit në formatin e ri të Ligës së Kampionëve, ku ata ishin kampionë në fuqi, nuk ishte i jashtëzakonshëm. Ekipi dështoi të arrinte në çerekfinale, duke i dënuar ata me një “playoff” kundër Mançester Sitit. Kundër ekipit të Pep Guardiolës ishte një nga pikat e pakta të ndritshme të sezonit, me Real Madridin që fitoi si në “Etihad” ashtu edhe në Bernabeu, në performancën e parë të shkëlqyer të Mbape para tifozëve të tij në shtëpi. Sidoqoftë, aventura kontinentale e Realit siç dukej pothuajse që nga fillimi, ishte e dënuar me një fund të parakohshëm. Pavarësisht se i mbijetoi një derbi të nxehtë evropian falë penalltisë së humbur në mënyrën më të pakuptueshme të mundur të Julian Alvarezit në gjuajtjet e penalltive në “Metropolitano”, Arsenali i dha fund papritur udhëtimit të Real Madridit në çerekfinale. Londinezët fituan si në shtëpi ashtu edhe në Madrid.
FUNDI I CIKLIT
Maji pati dy largime që, në realitet, shënuan fundin e një epoke në Real Madrid. Luka Modriç dhe Karlo Ançeloti u larguan zyrtarisht nga klubi, gjë që i dha atyre një përshëndetje madhështore në një ndeshje në shtëpi kundër Real Sociedad. Ndryshimi ishte më shumë seç pritej, me konfirmimin e ardhjes së Çabi Alonsos si trajner vetëm një ditë më vonë. Vëmendja e klubit u zhvendos më pas te Kupa e Botës për Klube, një turne që pritej të ishte arritja kulmore e një sezoni në të cilin ata aspiruan shtatë tituj, por arritën të siguronin vetëm dy, të dy në vitin 2024). Performanca e tyre në turneun e ri dhe ambicioz të FIFA-s ishte premtuese, duke treguar ndikimin e trajnerit të ri që nga dita e parë. Ekipi shfaqi një formë të pranueshme, por pësoi një humbje të thellë në gjysmëfinale kundër një skuadre të pandalshme të PSG-së, e cila gjithashtu shfrytëzoi disa gabime serioze individuale në fillim të ndeshjes. Megjithatë, precedenti i Kupës së Botës dukej si një bazë e mirë. Hajsen dhe Trent, dy nga fytyrat e reja të ekipit, kishin luajtur tashmë në Shtetet e Bashkuara, një ekip nga i cili, përveç Modriç, ishte larguar edhe Lukas Vaskez . Më vonë, mbërritën Karreras dhe Mastantuono. Me këto katër fytyra të reja, ekipi pati një nisje të gjallë të sezonit 25- 26, duke marrë kryesimin e ligës në javën e tretë. Ata do ta humbnin atë pozicion të privilegjuar në javën e 14, pas një barazimi në Girona, duke konfirmuar një rënie që kishte filluar një muaj më parë në Anfield, ku pësuan humbjen e tyre të parë në Ligën e Kampionëve. Që nga ajo ndeshje kundër Liverpulit, ekipi kishte regjistruar tre humbje dhe tre barazime në tetë ndeshje, gjë që i uli në vendin e dytë në ligë.
Pas njërës prej këtyre ndeshjeve, humbjes kundër Selta Vigos (7 dhjetor), klubi filloi të dyshonte në përshtatshmërinë e Çabi Alonsos. Trajneri bask kishte kaluar disa kriza, të tilla si humbja në derbi (27 shtator) dhe zëvendësimi kontrovers i Vinicius Juniorit në “El Clásico” (26 tetor). Klubi e mbështeti trajnerin në të dyja rastet, por humbja kundër Seltës dëmtoi besimin tek trajneri, i cili ka qenë në fije të perit që atëherë. Fitoret në tre ndeshjet e fundit të ekipit (Alaves dhe Sevijaa në La Liga dhe Talavera në “Copa del Rey”), larg lehtësimit të presionit, vetëm sa e kanë rritur atë, sepse performanca e ekipit mbetet larg pritjeve të vendosura në Kupën e Botës për Klube dhe në fillimin e këtij sezoni.
TRAZIRAT INSTITUCIONALE
Për më tepër, klubi po përjeton edhe trazira institucionale. Ndërsa po përgatitet një ndryshim në strukturën korporative të klubit, Reali është përfshirë në një përballje të drejtpërdrejtë me Barcelonën për shkak të “rastit Negreira”, të përshkruar nga Florentino Pérez në drekën e Krishtlindjeve me median si “skandali më i madh në historinë e futbollit”. Përgjigja e Joan Laportës ishte e shpejtë. Ai akuzoi presidentin Florentino Perez dhe Madridin se vuante nga “barceloneitis akut” dhe kritikoi ashpër Real Madrid TV, zëdhënësin e klubit në lidhje me vendimet e arbitrimit në sezonet e fundit, me vërejtje të ashpra që nuk kursyen as RFEF (Federatën Spanjolle të Futbollit) dhe as LaLiga-n. Ndërkohë, klubi vazhdon konfliktin e tij me UEFA-n për Superligën, me vendimet e fundit gjyqësore që favorizojnë interesat e Real Madridit në një mosmarrëveshje që pritet të zgjatet.
DRITAN LUNDRA-PANORAMASPORT.AL
Te lidhura
